Árlega fæðast um 70 börn með hjartagalla, eða u.þ.b. 1,7% allra lifandi fæddra barna hér á landi. Af þessum börnum þarf helmingur þeirra að gangast undir aðgerð og sum þeirra oftar en einu sinni. Þriðjungur þessara aðgerða er framkvæmdur hérlendis.
Flestir gallar eru meðhöndlaðir með skurðaðgerð,hjartaþræðingu eða lyfjagjöf..
Þökk sé framförum í læknisfræði er nú hægt að meðhöndla fjölda hjartagalla sem ekki var hægt að meðhöndla fyrir fáum árum. Hjartaaðgerðir og hjartaþræðingar eru nú framkvæmdar á yngri börnum en áður og í raun er algengt nú að slíkar aðgerðir séu gerðar á nýburum, en það hefur gefið þessum börnum mun betri batahorfur en áður.
Í tilefni af 15 ára afmæli Neistans var ákveðið að gefa út dagatal fyrir árið 2010.
Þetta er gullfallegt dagatal með myndum af 12 hjartveikum börnum á aldrinum 0-18 ára.
Þau eru til sölu á skrifstofu samtakanna að Síðumúla 6, s: 552-5744 eða í gsm 899-1823 og í blómabúðinni Englum og rósum Hólagarði.
Einnig verður eitthvað farið í hús og verða fulltrúar frá okkur í Smáralind, Kringlunni og Kolaportinu um næstu helgi 14. og 15. nóvember.
Dagatölin verða líka seld á Akureyri og Ísafirði.
Birna H. Rafnsdóttir tók myndirnar og færum við henni hjartans þakkir fyrir en hún gaf alla sýna vinnu við dagatalið.
Dagatalið kostar 1500 kr.
Ágóðinn rennur óskertur til handa hjartveikum börnum og fjölskyldum þeirra.
Hafðu stórt hjarta fyrir lítil.
Minnum félagsmenn á kortin í
Bláa lónið - hver fjölskylda getur haft kortið yfir helgi
Bláa lónið styrkir Umhyggju og félögin undir þeim.
Bláa lónið hefur veitt Umhyggju, félagi langveikra barna og fjölskyldna þeirra, styrk. Styrkurinn felst í 10 fjölskyldukortum og hvert kort veitir ótakmarkaðan aðgang í Bláa lónið fyrir tvo fullorðna og fjögur börn, 16 ára og yngri. Heildarverðmæti styrksins er 360.000 krónur.Grímur Sæmundsen, forstjóri Bláa lónsins hf., afhenti Rögnu K. Marínósdóttur, framkvæmdastjóra Umhyggju, og Hafsteini Helgasyni, 15 ára félaga í Umhyggju, kortin fimmtudaginn 8. janúar í Bláa lóninu.
Bláa lónið styrkir góð málefni á ári hverju í stað þess að senda viðskiptavinum jólakort. „Okkur hjá Bláa lóninu finnst það sérstaklega ánægjulegt að geta með þessum hætti veitt langveikum börnum og fjölskyldum þeirra tækifæri til að slaka á og endurnæra kraftana í Bláa lóninu,“ sagði Grímur Sæmundsen.
Hafsteinn sem er 15 ára nemandi í Njarðvíkurskóla og jafnframt hjartabarn veitti fyrsta kortinu viðtöku. Hann sagði það skemmtilegt að hafa möguleika á að bjóða fjölskyldunni í Bláa lónið þar sem hún gæti átt góða stund saman.
Hjartagáttin
Nýlega var opnaður nýr vefur, hjartagattin.neistinn.is. Hjartagáttin er í raun vefgátt, þar sem safnað er saman efni, sem kemur aðstandendum hjartabarna að gagni. Þar er fjallað um hjartaaðgerðir og undirbúning þeirra, hvernig annast skuli hjartabörn og fleira.
Sérstök áhersla er lögð á stuðning við þá sem þurfa að fara í aðgerð til Boston, s.s. hvernig best sé að undirbúa förina og dvölina á Children's Hospital Boston. Þá er einnig ítarlega fjallað um aðstöðuna og þjónustuna á spítalanum og um lífið utan spítalaveggjanna.
