Neistinn óskar öllum félagsmönnum sínum sem og öllum landsmönnum gleðilegra jóla og farsældar á nýju ári með hjartans þakklæti fyrir stuðninginn á árinu sem er að líða.
Í desember á hverju ári eru starfsmenn leikskólans Norðurbergs með vinaviku þar sem þau draga út leynivin og gera vel við hann í orði og litlum glaðningum. Í lok vinaviku var hefðin að gefa fallega lokagjöf með ákveðna upphæð í huga. Síðastliðin ár hafa þau gefið félagasamtökum sem hlúa að börnum, andvirði jólagjafarinnar. Í ár varð Neistinn, styrktarfélag hjartveikra barna fyrir valinu. Leikskólinn bauð framkvæmdarstjóra félagsins Fríðu Björk Arnardóttur og dóttur hennar Maríu Dís Gunnarsdóttir, til þeirra til að taka við 58.000 kr. gjöf fyrir starfsemi þeirra. Á myndinni má sjá Fríðu, Maríu Dís og Björgvin Unnar hjartastrákur, sem er á leikskólanum Norðurbergi.
Hjartans þakkir fyrir okkur og gleðileg jól.
Í liðinni viku fékk Neistinn veglegan styrk frá Landsneti en í stað þess að senda jólakort ákváðu þau að styrkja okkur í staðinn.
Við erum Landsneti hjartanlega þakklát og óskum stjórnendum og starfsfólki þeirra gleðilegra jóla.
Sumarbúðir norrænna hjarta-unglinga, 14 – 18 ára (sem fæddir eru 2001 -2005), verða á Íslandi næsta sumar.
Búðirnar standa yfir dagana 19. – 26. júlí 2019.
Þeir sem hafa áhuga á að taka þátt hafi samband við Neistann í síma 899-1823 eða sendi tölvupóst á neistinn@neistinn.is.
Pláss er fyrir 10 unglinga. Ath. að þeir ganga fyrir sem ekki hafa farið áður í norrænu búðirnar.
Umsóknarfrestur er til 31. janúar, 2019.
Dagatal Neistans 2019 er komið út!
Að vanda prýða dagatalið flottar myndir af hjartabörnum á öllum aldri.
Dagatalið kostar 2.000 kr. og rennur ágóðinn óskertur til styrktar hjartveikum börnum.
Þeir sem hafa áhuga á að kaupa dagatöl geta pantað það með pósti á neistinn@neistinn.is eða í síma 899-1823 á skrifstofutíma.
Þessi yndislegu brúðhjón, Ester og Björn giftu sig 12. maí síðastliðinn Þau komu færandi hendi á dögunum og gáfu
Neistanum 290 þúsund krónur sem safnaðist í brúðkaupi þeirra 
Ester er móðir Vignis Snæs hjartastráks og Björn er stjúpfaðir hans og þökkum við þeim kærlega fyrir þetta framlag
sem á eftir að hjálpa hjartabörnum og fjölskyldum þeirra mikið.
Við óskum þessu góðhjörtuðu brúðhjónum innilega til hamingju með lífið og hvort annað!
Þessar duglegu vinkonur, Elísa og Dagný, komu færandi hendi á skrifstofu Neistans á dögunum. Þær færðu félaginu að gjöf afrakstur tombólu sem þau héldu í Hafnarfirði.
Hjartans þakkir fyrir stelpur !
Hið árlega spilakvöld Neistans fyrir foreldra hjartveikra barna og fullorðna með hjartagalla verður haldið á föstudagskvöldið 2. nóvember kl. 19:30 í húsnæði Neistans að Síðumúla 6, 2.hæð .
Hjartaforeldrar og GUCH, mætum öll en aldurstakmark er 18 ára – við höfum gott af því !
Spiluð verður félagsvist (sem sumur kalla framsóknarvist).
Flestir kunna þetta fína spil – en þeir sem muna ekki reglurnar þurfa ekki að hafa neinar áhyggjur.
En maður þarf náttúrulega ekkert að kunna – aðalatriðið er að vera með.
Þeir sem mættu í fyrra vita að hverju þeir ganga enda var alveg hrikalega skemmtilegt, en í boði verður…
skemmtilegur félagsskapur
veglegir vinningar
snarl
(komum sjálf með dreitil til að væta kverkarnar því nóg verður spjallað – og jafnvel spilað)
Tilkynna þarf þátttöku í síðasta lagi miðvikudaginn 31. október á neistinn@neistinn.is. ATH mikilvægt að tilkynna þáttöku.
Alþjóðlegi hjartadagurinn er haldinn 29. september ár hvert en það er Alþjóðahjartasambandið (World Heart Federation) sem hvetur aðildarfélög sín um allan heim til að halda upp á Hjartadaginn.
Á Íslandi sameinast Hjartavernd, Hjartaheill, Neistinn og Heilaheill.
Í ár er lögð áhersla á að fólk hugsi um sitt eigið hjarta og ástvina sinna, „hjartað mitt og hjartað þitt“.
Félögin hafa haldið upp á daginn með hjartadagshlaupi og göngu um árabil í samvinnu við Kópavogsbæ sem hefur boðið þátttakendum í sund að hlaupi loknu.
Laugardaginn 29. september kl. 10:00 verður hjartadagshlaupið ræst. Boðið er upp á 5 og 10 km vegalengdir og er þátttaka ókeypis. Hlaupið verður ræst frá Kópavogsvelli og liggur hlaupaleiðin um Kársnesið. Skráning í hlaupið fer fram á www.netskraning.is og við stúkuna fyrir hlaup frá klukkan 9 en hlaupið hefst klukkan 10:00. Flögutímataka er í hlaupinu. Notaður verður tímatökubúnaður frá Tímataka.net og verða verðlaun veitt fyrir efstu sæti auk útdráttarverðlauna. Frjálsíþróttadeild Breiðabliks sér um framkvæmd hlaupsins. Þegar úrslit liggja fyrir verður hægt að sjá þau á heimasíðum félaganna, timataka.net og á hlaup.is. Þátttakendum verður boðið í sundlaugar Kópavogs að loknu hlaupi.
Þann 29. september kl. 11:00 hefst hjartadagsgangan í Elliðarárdalnum. Lagt verður af stað við brúnna sem er á milli gömlu rafstöðvarinnar og Toppstöðvarinnar. Göngustjórar eru starfsmenn Hjartaheilla og er þátttaka ókeypis. Genginn verður hringur sem er rétt um 4 km.
Hjartasjúkdómar eru fyrirbyggjanlegir og með því að tileinka sér heilbrigðan lífsstíl má seinka sjúkdómnum og jafnvel koma í veg fyrir ótímabær dauðsföll.
Hreyfðu þig! Hreyfing þarf ekki að vera bundin við íþróttir eða líkamsrækt og getur verið margs konar, eins og við heimilisstörf, garðvinnu eða einfaldlega að fara út og leika við börnin. Settu þér raunhæf markmið, ekki byrja á því að klífa fjall eða hlaupa maraþon, þú byggir upp þrek og þol smám saman.
Borðaðu hollt! Takmarkaðu neyslu á unnum matvörum sem oft innihalda mikinn sykur, salt og mettaða fitu. Gerðu holla matinn spennandi fyrir börnin, berðu fram litríkan mat eins og ávexti og grænmeti og láttu þau aðstoða við matargerðina. Leiddu hugann að skammtastærðum, notaðu minni matardiska og leyfðu grænmetinu og ávöxtunum að taka mesta plássið.
Segðu NEI við tóbaki! Hafðu reykingarlaust umhverfi. Fræddu börnin þín um skaðsemi tóbaks til að hjálpa þeim að velja líf án tóbaks. Til eru ýmsar leiðir til að hætta að reykja og stundum þarf að leita til sérfræðings.
Núna eru liðnir nokkrir dagar frá Reykjavíkurmaraþoninu, og búið að loka fyrir áheitasöfnun.
Í ár hlupu hátt í 95 manns fyrir félagið, og söfnuðu hvorki meira né minna en 2.864.978 krónum!
Við viljum þakka öllum hlaupurunum okkar, sem og öllum þeim sem hétu á þá, og að sjálfsögðu öllum sem mættu á hvatningarstöðina og hvöttu hlauparana áfram!
Takk fyrir okkur ♥
Hjartans þakkir fyrir okkur, ykkar framlag er okkur ómetanlegt ♥
