Skip to main content
Category

Uncategorized

Neistinn logo

Styrktarsjóður hjartveikra barna

By Fréttir, Uncategorized

Næsti úthlutunarfundur Styrktarsjóðs hjartveikra barna verður þriðjudaginn 3. maí. Fjölskyldur sem orðið hafa fyrir fjárhagsörðugleikum vegna veikinda barna sinna eru hvattar til að sækja um styrk fyrir þann tíma.

Styrktarumsókn
Fylla þarf út umsókn um fjárstyrk og láta læknisvottorð fylgja með. Umsókninni er síðan skilað til:
Gunnlaugs Sigfússonar barna-hjartasérfræðings
Barnaspítala Hringsins
101 Reykjavík

Styrktarumsókn 

Allar nánari upplýsingar má fá á skrifstofu Neistans, í síma 899-1823 eða með því að senda tölvupóst á netfangið neistinn@neistinn.is.

Sumarbúðir

Þakklæti, gleði og vinátta

By Fréttir, Uncategorized

Margrét Ásdís fyrrum hjartabarn og annar fararstjóri Neistans í Norrænu sumarbúðirnar segir hér frá sinni upplifun af sumarbúðunum.

Árið 2008, þá 14 ára, fór ég í norrænu sumarbúðirnar í fyrsta sinn. Ég ákvað að slá til og skella mér með þrátt fyrir að hafa aldrei heyrt um sumarbúðirnar áður né þekkti þá sem væru að fara. Við vorum bara tvær sem fórum frá Íslandi. Ég og Guðný Sif fórum ásamt fararstjóra og var förinni heitið til Svíþjóðar.

Þrátt fyrir að við þekktumst ekkert varð þessi ferð ein sú skemmtilegasta sem ég hef upplifað. Ég var alls ekkert viss um að fara en ákvað svo að slá til og skella mér. Þetta er ákvörðun sem ég sé sko ekki eftir. Við fórum í skemmtigarða, í leiki, í verslunarferð, vatnsstríð, kvöldvökur og allskonar aðra afþreyingu ásamt því að fá nægan tíma til þess að kynnast hinum krökkunum og mynda vinasambönd. Ekki nóg með að fá að fara til útlanda kynntumst við öðrum unglingum og mynduðum vinasambönd sem eiga eftir að endast okkur í mörg ár, jafnvel út ævina.

Í þessari fyrstu ferð í NYC (Nordic Youth Camp) ákvað ég fara á hverju ári ef ég ætti kost á því. Ári seinna var förinni heitið til Noregs en þá var hópurinn orðinn stærri. Við fórum sex unglingar saman frá Íslandi og eyddum frábærri viku í yndislegum félagsskap með góðum vinum, bæði vinum sem við höfðum kynnst árinu áður í Svíþjóð en einnig nýjum vinum. Ég endaði á því að fara fjögur ár til fjögurra mismunandi landa og alltaf var jafn gaman í sumarbúðunum. Hvort sem það var úrhellis rigning í Danmörku, fjórhjólaferð á Íslandi eða bara að hanga uppi á herbergi með vinum frá hinum löndunum, þá eru þetta minningar um einstaklega skemmtilegar vikur sem ég er svo þakklát að hafa átt því aldrei hefði mig grunað hvað ég myndi skemmta mér vel.

Í dag er ég 28 ára og er orðin fararstjóri fyrir Neistann í þessum sömu sumarbúðum. Þegar ég hugsa til baka til áranna sem ég fór sjálf sem unglingur stendur helst upp úr gleðin og hvað var ótrúlega gaman að fara ásamt þakklæti yfir öllum vinunum sem ég eignaðist. Þetta eru dýrmætir vinir sem ég er ennþá í sambandi við, 14 árum seinna. Sumarbúðirnar eru stór hluti af því sem gerði unglingsárin eins skemmtileg og þau voru.  Ég hefði aldrei viljað missa af tækifærinu að fara.

uglingastarf neistans Speed boat adventure

Lilja Eivor mun leiða unglingastarf Neistans

By Fréttir, Uncategorized, Unglingastarf

Til þess að efla unglingastarfið hjá Neistanum hefur Lilja Eivor Gunnarsdóttir tekið að sér að leiða það.

Nánar um Lilju

Lilja er með B.A. gráðu í tómstunda- og félagsmálafræði. Hún stundar framhaldsnám í foreldrafræðslu og uppeldisráðgjöf og starfar auk þess sem þjálfari á námskeiðum hjá KVAN og hefur náð frábærum árangri með skjólstæðingum sínum

Hún hefur starfað með börnum og unglingum í mörg ár, þá aðallega sem stuðningur fyrir börn með sérþarfir. Hún hefur unnið með unglingum í leiklist, samskiptahæfni og við það að hjálpa þeim að stækka þægindarammann sinn. Lilja vann einnig á Landspítalanum með ungmennum í fíkniefnavanda.

Næsti hittingur

Næsti hittingur verður á sunnudaginn 27. mars klukkan 19.30 þar sem Lilja mun sjá um að hrista hópinn (14-18 ára) saman. Jafnframt verða næstu viðburðir skipulagðir í samráði við þá sem mæta.

Hist er í húsakynnum KVAN, Háabraut 1a, 200 Kópavogi (Safnaðarheimili Kópavogskirkju, gengið er inn að neðanverðu).

Skráning fer fram með því að senda tölvupóst á netfangið lilja@kvan.is

Þeir sem vilja fara í norrænu sumarbúðirnar eru sérstaklega hvattir til að mæta.

Norrænu sumarbúðirnar 2017

Norrænu sumarbúðirnar 2022

By Fréttir, Uncategorized, Unglingastarf

Sumarbúðir norrænna hjartaunglinga verða haldnar í Danmörku vikuna 24. – 31. júlí 2022. Boðið verður upp á metnaðarfulla dagskrá þar sem áhersla er lögð á að allir fái að njóta sín og blómstra. Undanfarin ár hefur verið dýrmætt að fylgjast með unglingunum mynda traust jafningjasambönd í sumarbúðunum.

Fyrir hverja:

Sumarbúðirnar eru fyrir 14-18 ára unglinga (fæddir eru 2004-2008) með meðfædda hjartagalla. Í heildina taka 50 unglingar þátt en þeir koma frá Íslandi, Danmörku, Svíþjóð, Noregi og Finnlandi. Í sumarbúðunum verður starfandi hjúkrunarfræðingur auk þess sem hvert land sendir 2 farastjóra út með krökkunum.

Arnar Þór Hjaltested og Margrét Ásdís Björnsdóttir verða farastjórar í ferðinni og munu halda vel utan um hópinn.

Verð:

75.000 krónur. Innifalið í verði er flug, afþreying, fullt fæði og gisting.

Skráning:

Þeir sem hafa áhuga á að skrá sig í Norrænu sumarbúðirnar eru beðnir um að hafa samband við Neistann með því að hringja í síma 899-1823 eða með því að senda tölvupóst á netfangið neistinn@neistinn.is. Þar sem takmarkað pláss er í sumarbúðirnar ganga þeir fyrir sem ekki hafa farið áður. Umsóknarfrestur er til 11. apríl 2022.

Facebook hópur unglingastarfsins

Hjarta í góðum höndum

Styrktarsjóður

By Fréttir, Uncategorized

Við leitum eftir liðstyrk í Styrktarsjóð hjartveikra barna til þess að taka við stjórnarsetu af Sigríði Jónsdóttur, gjaldkera sjóðsins. Sjóðurinn er byggður upp af ávöxtun eigin fjármuna og frjálsum framlögum. Gjaldkeri hefur umsjón með fjárfestingum sjóðsins.
Áhugasamir eru hvattir til þess að hafa samband með því að hringja í síma 899-1823 eða með því að senda tölvupóst á netfangið neistinn@neistinn.is

Styrktarsjóður hjartveikra barna gegnir mikilvægu hlutverki og veitir fjölskyldum hjartveikra barna fjárhagslegan stuðning. Úthlutanir fara fram þrisvar á ári og sjóðnum er m.a. ætlað að létta undir varðandi tekjumissi og kostnað hjartafjölskyldna tengdan aðgerðum og rannsóknum.

Stjórn Neistans

Í stjórn styrktarsjóðsins sitja:
Guðrún Pétursdóttir – formaður
Össur Skarphéðinsson – varaformaður
Sigríður Jónsdóttir – gjaldkeri
Gunnlaugur Sigfússon -meðstjórnandi
Kristín Ólafsdóttir – varastjórn

Starfsemi barnahjartalækna flytur

By Fréttir, Uncategorized

Um leið og Neistinn óskar félagsmönnum sínum og velunnurum gleðilegs nýs árs viljum við koma eftirfarandi upplýsingum á framfæri.

Frá og með mánudeginum 3. janúar hefur þjónusta barnahjartalækna sem höfðu aðsetur í Domus Medica, flutt í Urðarhvarf 8, Kópavogi. S: 563-1010.

Þangað flytja líka aðrir barnalæknar sem störfuðu í Domus og Barnalæknaþjónustan.

Í Domus Medica voru þeir Gunnlaugur Sigfússon, Gylfi Óskarsson og Sigurður Sverrir Stephensen með stofu.

Hróðmar Helgason er með aðsetur í Heilsuklasanum, Bíldshöfða 9. S: 599-1600.

hjarta

Sorgarhópur fyrir foreldra sem misst hafa barn eftir veikindi

By Fréttir, Uncategorized

Nú stendur yfir skráning í lokaðan sorgarhóp fyrir foreldra sem misst hafa barn eftir veikindi þar sem boðið verður upp á faglega leiðsögn og vandaða dagskrá.

Hvenær:

Sorgarmiðstöðin mun halda utan um hópinn sem mun hittast klukkan 20:00 alla mánudaga frá 11. október til 15. nóvember (6 skipti).

Þátttakendur hittast í viðtalsherbergi Einstakra barna, Háaleitisbraut 13, 2. hæð til hægri, 108 Reykjavík.

Skráning:

Skráning fer fram með því að senda tölvupóst á netfangið  neistinn@neistinn.is eða með því að hringja í síma 899-1823.

Standa saman

Systkinasmiðjan

By Fréttir, Uncategorized

Í vetur býðst systkinum hjartabarna að sækja námskeið sem Umhyggja í samstarfi við Systkinasmiðjuna stendur fyrir. Samstarfið hefst á kynningarfundi fyrir foreldra sem haldinn verður á Zoom þann 13. október klukkan 20:00.

Kynningarfundur

Fyrir hverja?

Systkinasmiðjan er með námskeið fyrir krakka á aldrinum 8-14 ára sem eiga það sameiginlegt að eiga langveik systkini. 

Markmið:

Námskeið Systkinasmiðjunnar eiga að hjálpa börnum við að tjá sig um reynslu og upplifun sína af því að eiga systkini með sérþarfir. 

Markmið námskeiðsins er að veita systkinunum:

  • Tækifæri til að hitta önnur systkini í skipulögðu og skemmtilegu umhverfi.
  • Tækifæri til að ræða við jafnaldra sína á jákvæðan hátt um margt sem tengist því að eiga systkini með sérþarfir. 
  • Innsýn í það hvernig megi takast á við þær margbreytilegu aðstæður sem fylgja því að eiga systkini með sérþarfir. 
  • Tækifæri til að læra meira um fötlun eða veikindi systkina sinna. 

 Hvenær:

Fyrsta námskeiðið verður haldið 5.- 7. nóvember á Háaleitisbraut 13

Hjardagshlaup og ganga

By Uncategorized

Alþjóðlegi hjartadagurinn er haldinn 29. september ár hvert og við höldum upp á daginn með hjartadagshlaupi og hjartadagsgöngu.

Laugardaginn 2. október klukkan 10:00 verður hjartadagshlaupið ræst. Boðið er upp á 5 og 10 km vegalengdir og er þátttaka ókeypis. Hlaupið verður ræst frá Kópavogsvelli og liggur hlaupaleiðin um Kársnesið.

Hjartadagshlaup

Þann sama dag klukkan 9:30 hefst hjartadagsgangan fyrir þá sem ætla ekki að hlaupa. Gengið verður inn Kópavogsdalinn ca. 2-3 km. Labbað verður af stað fyrir framan stúkuna á Kópavogsvelli.

hoppandi börn

KVAN námskeið fyrir 10-15 ára

By Fréttir, Uncategorized

Nú stendur yfir skráning á KVAN námskeið fyrir systkini langveikra barna þar sem þátttakendur ættu að geta fundið aukinn kraft, meira jafnvægi og aukið trú sína á eigin getu.

Hvenær:

Námskeiðið hefst 17. september fyrir börn á aldrinum 10-12 ára og mun fara fram á föstudögum frá klukkan 16:00 til 18:30 (8 skipti).  Fyrir unglinga á aldrinum 13-15 ára hefst námskeiðið 21. september og mun fara fram á þriðjudögum frá klukkan 18:30-21:30.

Þátttakendur hittast í húsakynnum KVAN, Háabraut 1a, 200 Kópavogi (Safnaðarheimili Kópavogskirkju, gengið er inn að neðanverðu).

Fyrir hverja:

Námskeiðin eru ætluð börnum fjölskyldna sem eru í aðildarfélögum Umhyggju. Við skráningu er mikilvægt að félagsmenn taki fram að þeir séu í Neistanum (sett í reitinn upplýsingar).

Skráningargjaldið er aðeins 7.000 krónur þar sem það er niðurgreitt (hefðbundið verð er 88.000 krónur).

Skráning fyrir 10-12 ára börn           Skráning fyrir 13-15 ára ungmenni