Category

Fréttir

By Fréttir

Neistablaðið 2020 er komið út!

Í ár var ákveðið að prófa að gefa blaðið út á rafrænu formi en hér fyrir neðan má lesa blaðið.

Í blaðinu má m.a. finna grein eftir Hróðmar Helgason barnahjartalækni og viðtal við Elínu Viðarsdóttur, fyrsta formann Neistans og stofnanda og bréf til Neistans af sjúkrasæng í Svíþjóð.

Reykjavíkurmaraþon – Hlauptu þína leið!

By Fréttir

   

Hlauptu þína leið!

 

Þó að ekki sé hægt að halda Reykjavíkurmaraþon Íslandsbanka í ár er samt hægt að reima á sig hlaupaskóna með því að fara út að hlaupa. Við hvetjum alla til að taka þátt í áheitasöfnuninni sem fer fram á hlaupastyrkur.is. Veldu þína leið, og þinn tíma.

Það kostar ekkert að vera með!

 

Þeir sem vilja taka þátt í góðgerðarhlaupinu þurfa að skrá sig til leiks og velja þá vegalengd og góðgerðarfélag og byrja svo að safna áheitum.

Á rmi.is er hægt að finna tillögur að hlaupaleiðum fyrir Hetjuhlaupið, 3 km skemmtiskokk, 10 km hlaup, hálfmaraþon og maraþon.

Hlaupaátakið stendur yfir frá 15.- 25. ágúst 2020 en áheitasöfnuninni lýkur miðvikudaginn 26. ágúst 2020.

   

Perluhittingur hjartamæðra

By Fréttir

 

Á miðvikudagskvöld hittust nokkrar magnaðar hjartamömmur, spjölluðu, áttu góða kvöldstund saman og perluðu armbönd með áletruninni “Hjartabarn”.

Verkefnið er tilraunaverkefni og er í vinnslu en armböndin eru að sænskri fyrirmynd þar sem stendur á þeim “Hjartebarn”. Í Svíþjóð eru þau seld til styrktar sænsku barnahjartasamtakanna og vonum við að verkefnið fari vel af stað og mun Neistinn jafnvel koma til með að selja armböndin til styrktar félagsins ef vel gengur.

Við þökkum hjartamömmum kærlega fyrir framlagið!

Fréttir frá aðalfundi

By Fréttir

Aðalfundur fór fram í gær, þann 3. júní. Árið 2019 var viðburðarríkt og gott ár og almennt ríkir mikil ánægja með störf félagsins.

Kosið var í 4 sæti stjórnar auk formanns. Guðrún Bergmann Franzdóttir, Katrín Brynja Björgvinsdóttir, Arna Hlín Daníelsdóttir og Ingibjörg Ólafsdóttir gáfu ekki kost á sér áfram en Neistinn þakkar þeim kærlega fyrir störf þeirra í þágu félagsins.

Ragna Kristín Gunnarsdóttir var kjörinn formaður og í stjórn félagsins sitja nú:

  • Ragna Kristín Gunnarsdóttir – formaður
  • Berglind Ósk Ólafsdóttir – varaformaður
  • Jónína Sigríður Grímsdóttir – ritari
  • Elín Eiríksdóttir – gjaldkeri
  • Anna Steinsen – meðstjórnandi
  • Sara Jóhanna Jónsdóttir – meðstjórnandi
  • Hrafnhildur Sigurðardóttir – meðstjórnandi

Neistinn er heppinn að fá slíkar kraftmiklar kjarnakonur til liðs við sig og við hlökkum mikið til komandi tíma með þessari öflugu stjórn.

Ellen Helga Steingrímsdóttir gegnir starfi framkvæmdastjóra félagsins.

 

25 ára afmæli!

By Fréttir

Í dag fagnar Neistinn 25 ára afmæli!

Í ljósi skrítinna tíma verður engin afmælishátíð í ár en við munum í stað þess halda upp á veglegt 26 ára afmæli að ári liðnu og vonumst við til að sjá sem flesta okkar kæru félaga þá.

Neistinn á traust og gott bakland og þökkum við öllum okkar vinum og velunnurum fyrir að gera okkur kleift að byggja upp þetta frábæra félag, styðja við fjölskyldur hjartveikra barna og vera til staðar fyrir þær þegar gengið er í gegnum óvissutíma.

Við viljum einnig þakka öllum okkar frábæru félagsmönnum fyrir samfylgdina og allar góðu jafnt sem  lærdómsríku stundirnar á síðastliðnum 25 árum.

Við höldum ótrauð áfram á þessari braut og horfum fram á veginn með bjartsýni og léttri lund.

Með kærri þökk,

Starfsfólk og stjórn Neistans.

 

Aðalfundur Neistans 2020

By Fréttir

Aðalfundur Neistans verður haldinn miðvikudaginn 3. júní kl. 20:00 í Síðumúla 6 (2. hæð).

Dagskrá:

  1. Kosning fundarstjóra og ritara
  2. Skýrsla stjórnar
  3. Reikningar félagsins lagðir fram
  4. Reikningar Styrktarsjóðs hjartveikra barna lagðir fram
  5. Ákvörðun félagsgjalds
  6. Kosning skoðunarmanns reikninga
  7. Kosning formanns*
  8. Kosning stjórnar**
  9. Önnur mál

*Kosið verður í sæti formanns til tveggja ára.

**Kosið verður í 4 sæti í stjórn til tveggja ára. 

Þeir sem hafa áhuga á að bjóða sig fram til setu í stjórn Neistans, vinsamlegast láti vita eigi síðar en 5 dögum fyrir aðalfund á netfangið neistinn@neistinn.is.

Gleðilegt sumar!

By Fréttir

Neistinn óskar öllum vinum og velunnurum gleðilegs sumars!

Með hækkandi sól og bjartari tímum framundan vonum við að sumarið færi ykkur gæfu og gleði!

Takk fyrir veturinn 🙂

 

 

Páskabingó Neistans – Frestað

By Fréttir

Áætlað var að halda páskabingó Neistans, 1. apríl. nk.

Í ljósi samkomubanns munum við fresta því um óákveðinn tíma.

Ný dagsetning verður auglýst við fyrsta tækifæri.

Hugsum vel um hvort annað á þessum óvissutímum.

 

 

Nýr starfsmaður

By Fréttir

Stjórn Neistans hefur ráðið Ellen Helgu Steingrímsdóttur í starf framkvæmdastjóra. Ellen Helga hefur mikla reynslu af starfi Neistans, sem fyrrverandi stjórnarmaður og sem móðir hjartabarns. Ellen Helga er hjúkrunarfræðingur að mennt og hefur síðustu ár starfað sem hjúkrunarfræðingur á Barnaspítala Hringsins og mun hún halda áfram starfi sínu þar, samhliða starfinu hjá Neistanum.

Ellen Helga tekur við starfinu um miðjan mars af Fríðu Björk Arnardóttur sem hefur verið framkvæmdastjóri síðastliðin 4 ár.

Neistinn óskar Ellen Helgu til hamingju með starfið og þakkar Fríðu fyrir vel unnin störf síðustu ár.

Leiðbeiningar frá Sóttvarnalækni

By Fréttir

Frá sóttvarnalækni

Sóttvarnalæknir beinir því til félagasamtaka og félaga sjúklinga og/eða aðstandenda að koma eftirfarandi skilaboðum um smitvarnir vegna kórónaveiru (COVID-19) á framfæri til þeirra sem málið varðar:

Gripið hefur verið til margvíslegra varúðarráðstafana að undanförnu til að hefta útbreiðslu COVID-19 kórónaveirunnar hér á landi. Veirunnar varð fyrst vart í Kína í lok desember síðastliðnum og varð þar að faraldri. Síðan hefur hún breiðst nokkuð hratt til annarra landa og hér á landi hefur greinst smit hjá nokkrum einstaklingum sem allir höfðu verið í útlöndum.  

Einkenni þeirra sem veikjast í kjölfar smits líkjast helst inflúensusýkingu, þ.e. hósti, hiti, bein- og vöðvaverkir og þreyta. Flestir sem smitast finna aðeins fyrir vægum einkennum og jafna sig fljótt. Ekki verður þó horft fram hjá því að veiran getur valdið alvarlegum veikindum og í verstu tilfellum reynst lífshættuleg. Þess vegna er mjög mikilvægt að allir leggist á eitt til að hefta útbreiðslu og fylgi í einu og öllu leiðbeiningum heilbrigðisyfirvalda um sóttvarnir. 

Heilbrigðisyfirvöld beita margvíslegum leiðum til að koma upplýsingum og leiðbeiningum til almennings á framfæri sem víðast. Með þessu bréfi er óskað eftir liðsinni ykkar sem það fáið við að koma eftirfarandi upplýsingum á framfæri við félagsmenn ykkar og skjólstæðinga: 

·         Gæta vel að hreinlæti, þvo hendur reglulega með sápu og nota handspritt. Forðast snertingu við augu, nef og munn. 

·         Hósta og hnerra í krepptan olnboga eða í pappír þegar um kvefeinkenni er að ræða. 

·         Forðast náið samneyti við einstaklinga með hósta og almenn kvefeinkenni. 

·         Sýna aðgát í umgengni við algenga snertifleti á fjölförnum stöðum, s.s. handrið, lyftuhnappa, snertiskjái, greiðsluposa og hurðahúna. 

·         Sleppa handaböndum og faðmlögum og heilsa fremur með brosi.  

Meðfylgjandi er einnig leiðbeiningar á veggspjaldi sem má prenta út og hengja upp.

Ef einstaklingur finnur fyrir veikindum og óttast að um smit af völdum kórónaveiru sé að ræða á hann að hringja í símanúmerið 1700 til að fá nánari upplýsingar. Ekki mæta á bráðamóttöku eða á heilsugæslustöð nema að fengnum ráðleggingum í síma. 

 

Á vef embættis landlæknis www.landlaeknir.is eru birtar ítarlegar leiðbeiningar til almennings og nýjustu upplýsingar af kórónaveirunni eftir því sem þörf krefur. 

 

Samhæfingarstöð almannavarna