2022

Loksins var hægt að halda árshátíð Neistans og Takts!

Árshátíðin var haldin þann 8. október síðastliðin og var hún mjög vel sótt. Það var alveg frábært að sjá svona marga meðlimi Neistans og Takts saman komna að njóta góðar kvöldstundar saman. Árshátíðin var haldin í Gala salnum eins og undanfarin ár, þess má til gamans geta að í fyrsta sinn notuðum við allan salinn.

 

Gleðin hófst með fordrykk og voru allir gestir boðnir velkomnir með happdrættismiða og gengu allir út með frábæran vinning í farteskinu. Lalli töframaður sá til þess að salurinn stóð á öndinni af hlátri. Hann heldur betur hélt stuðinu í fólki. Gerði grín af sér og fékk sjálfboðaliða úr sal til að aðstoða við töfrabrögð. 

 

Sem fyrr var dýrindis matur frá Grillvagninum á boðstólnum. Allir borðuðu fylli sína og enginn fór svangur heim. Alltaf fagmanlega gert hjá þeim. 

 

Erlendu gestirnir okkar, sem voru á landinu til að vera viðstödd norðurlandaþingið sem Neistinn hélt að þessu sinni, skelltu sér á árshátíðina. Þau höfðu orð á ekkert þessu líkt sé í þeirra starfi en eru núna að hugsa sig vel um hvort það verði ekki breyting á. Hugsið ykkur mögulega erum við búin að hafa áhrif á félagsstarf hinna norrænu barna hjarta félaganna til hins betra!

 

Eftir að eiginlegri dagskrá lauk og Lalli töframaður var búin að sjá til þess að fólk væri komið með harðsperrur af hlátri tók hann að sér DJ störf og smalaði fólki út á dansgólfið í rífandi stemmingu. Þegar hann svo lauk sínum störfum alveg þá tók DJ spotify við og gleðin varði fram á nótt. 

 

Mikil gleði var við völd og virðist sem meðlimir Neistans og Takts fannst mjög kærkomið að koma loksins saman, lyfta sér upp, spjalla, dansa, taka myndir í mynda standinum senda myndir á instagram og knúsast!

Við þökkum skipuleggjendum árshátíðarinnar kærlega fyrir skemmtilega og fallega árshátíð.

Hlökkum til að sjá sem flesta á spilakvöldi núna í nóvember!

Dagana 7-9 október var Norðurlandaþing 2022 haldið hér á landi. Komu fulltrúar barnahjartasamtaka allra norðurlandanna hingað eða alls 10 fulltrúar nágrannaþjóða okkar. Dagskrá helgarinnar var fjölbreytt og kynntum við þau fyrir matarmenningu okkar, miðborginni og hvernig við höldum upp stuðinu ásamt því að hlusta á fróðlega fyrirlestra og ræða málefni síðustu ára, kynnast hinum félögunum og hvað framundan er. 

 

Fyrirlesarar helgarinnar voru Gyða Valdís Guðmundsdóttir sem flutti kynningu úr meistaraverkefninu sínu í hjúkrun sem fjallaði um upplýsingar og fræðslu sem foreldar barna með hjartagalla þarfnast. Elín Ögmundsdóttir sérfræðingur í nýburahjúkrun á Vökudeildinni og meðlimur í flutningsteymi Vökudeilarinnar kynnti fyrir okkur starf flutningsteymisins bæði þegar börn eru flutt innanlands og einnig þegar þau eru flutt erlendis. Anna Steinsen steig svo í pontu og flutti fyrirlestur undir yfirskriftinni “Aron and me” en hún er móðir drengs sem fæddist með hjartagalla og þurfti að fara í aðgerð erlendis. 

 

Eftir hádegismat fengum við að heyra hvernig sumarbúðirnar gengu sem voru að þessu sinni haldnar í Danmörku í júlí. Hanne K Örtved sýndi okkur dagskránna, myndir, myndbönd og leit heldur betur út fyrir að hafa verið gaman. Einnig sýndu niðurstöður kannanar það sama, en við lok sumarbúðanna gefa þátttakendur vikunni einkunn, niðurstöðurnar voru jákvæðar og eru krakkarnir eflaust spenntir fyrir næstu sumarbúðum sem haldnar verða í Finnlandi. Við fengum einmitt að sjá drög að dagskrá næstu sumarbúða þegar Katja Laine frá Finnlandi kynnti fyrir okkur hvernig sumarbúðum verður háttað sumarið 2023.

 

Eftir fyrirlestrana var áfram fundað en þegar formlegum fundarhöldum lauk gátu þátttakendur skoðað sig um gert sig fín því þau mættu galvösk á árshátíð Neistans sem var loksins haldin. Þau ásamt öllum öðrum gestum skemmtu sér konunglega og voru meira að segja að tala um að þau þyrftu að innleiða eitthvað svipað fyrir sín félög. Við hérna á Íslandinu góða erum greinilega að hafa góð áhrif á hin norðurlöndin. . 

Á sunnudeginum var gestunum boðið uppá að fara í Reykjavík Food Walk. Við löbbuðum….eða meira fukum á milli 5 veitingastaða og fengum að smakka það besta sem íslensk matarhefð býður upp á. Við vorum með skemmtilegan leiðsögumann og var mikið hlegið og skemmt sér. 

 

Eftir smá frí tíma til að skoða sig um var skellt sér í Sky Lagoon, en þó ekki fyrr en öllum gestum þingsins var bent á að kaupa húfur ef þau komu ekki með slíkar nauðsynjar með sér hingað. Þau voru öll mjög þakklát fyrir þessa uppástungu því það er heldur skrautlegt að vera ofan í lóninu í gulri viðvörun. Öll nutu þau sín vel og Finnarnir gáfu saununni ágæta einkunn, hún var heldur þurr að þeirra sögn. 

 

Við þökkum gestum okkar kærlega fyrir komuna og við lærðum helling af hvernig þau vinna sitt starf og að sama skapi fannst þeim margt sniðugt sem við erum að gera. Það er mjög mikilvægt fyrir okkur sem lítið einangrað land að eiga í góðu norðurlandasamstarfi, það er mikill munur að þurfa ekki að vera alltaf að finna upp hjólið og geta leitað til annara. 

Næsta norðurlandaþing verður haldið næsta haust í Kaupmannahöfn og er undirskifaðri farið að hlakka mikið til að hitta nýja vini aftur. 

 

Jónína Sigríður Grímsdóttir.

Í tilefni af alþjóðlega hjartadeginum 29. september 2022 stóð starfsfólk hjartarannsóknar fyrir áheitasundi til styrktar Neistanum ❤️

Syntir voru 5 metrar fyrir hvern einstakling sem er með gang- eða bjargráð hér á landi alls 15.750 metrar !!

Takk kærlega fyrir okkur ❤️❤️❤️❤️

 

Árshátíð fyrir félagsmenn Neistans og Takts sem hafa náð 18 ára aldri verður haldin hátíðleg 8. október 2022!
Húsið opnar kl 18:30 með fordrykk og mun Grillvagninn síðan sjá um að enginn fari út í nóttina svangur.

Veislustjóri verður sá eini og sanni Lárus Blöndal, einnig þekktur sem Lalli töframaður, hann mun halda uppi fjörinu og þegar líður á kvöldið mun Dj Spotify taka við keflinu.

Happdrættið verður á sínum stað með stórglæsilegum vinningum ásamt því að hægt verður að festa gleðina á filmu í myndabásnum fræga !

Kaffi og gos í boði en aðra drykki komum við með okkur sjálf 🥂

Verðið eru litlar 5.500 kr á haus og millifærsla fer inn á eftirfarandi reikning: 0133-26-011755 kt: 490695-2309 og senda svo staðfestingu á neistinn@neistinn.is

Hægt er að skrá sig og greiða til 3.október og miðar verða afhentir við innganginn

Hlökkum til að sjá ykkur og eiga frábæra stund saman

Loksins loksins verður aftur hægt að halda árshátíð !

Foreldrar og 18 ára og eldri með hjartagalla takið 8.október frá og fylgist vel með á næstunni með nánir upplýsingum 🥳❤️

Fimmtudaginn 11. ágúst var sumarhátíð Neistans loksins haldin eftir 2 ára bið. Hátíðin var haldin í Guðmundarlundi í Kópavogi. Þó að sólin hafi ekki látið sjá sig var vel mætt og bros á öllum andlitum.

Það var sannarlega gaman að sjá félagsmenn aftur eftir ansi langan tíma þar sem það var ekki hægt að hittast enda margir í áhættuhóp. 

Guðrún og Hrafnhildur kepptust við að grilla pylsur ofan í gestina svo var boðið upp á ís, gos, svala og fjölbreytta dagskrá.

Krakkahestar komu og fengu krakkarnir að fara á bak við mikla lukku allra. Lalli töframaður mætti á svæðið í stuði, gaf börnunum blöðrudýr, var með skemmtiatriði og mátti heyra hlátur áheyrenda langt að.

Tónafljóð lokaði svo dagskránni með einkar skemmtilegu tónlistaratriði eins og þeim einum er lagið og er undirrituð enn að söngla lög úr vinsælum teiknimyndum.

Í Guðmundarlundi er frábær aðstaða fyrir alla. Sumir gestir hátíðarinnar spreyttu sig á minigolfi og frisby golfi. Einnig voru allskonar leiktæki fyrir krakkana. Það lögðust eflaust mörg börn þreytt á koddann sinn eftir daginn. 

Við þökkum samstarfsaðilum sem gerðu það að verkum að það var hægt að halda svona veglega sumarhátíð! 

 

Jónína Sigríður Grímsdóttir

Viltu vera með okkur í liði ?❤️

Öll börn sem fæðast hér á landi með meðfæddann hjartagalla fá poka í gjöf frá Neistanum. Í þessum poka hefur verið að finna upplýsingar um það sem er framundan ásamt kisubangsa sem er heklaður af Boggu ömmu, prjónuðum Neistahúfum, tösku og vatnsbrúsa frá Tulipop ❤️

Við erum að leita af yndislegum fyrirtækjum sem væru til í að hjálpa okkur að gleðja þessar fjölskyldur áfram ❤️❤️