„Láttu hjartað ráða“ var söfnun sem Rekstrarfélag Kringlunnar stóð fyrir til stuðnings Neistanum, styrktarfélagi hjartveikra barna. Söfnunin var liður í hátíðahöldum í tilefni 25 ára afmælis Kringlunnar.

 

Afraksturinn hefur nú verið afhentur Neistanum og safnaðist rúmlega ein milljón króna í stóran hjartalaga risasparibauk. Söfnunarhjartað var staðsett í hjarta Kringlunnar og var fólk hvatt til að láta 500 kr. af hendi rakna og um leið að lita hjartað rautt.

 

Stærsta einstaka framlagið í söfnunina kom frá fasteignafélaginu Reitum, sem gaf 250 þúsund krónur.

 

Sigurjón Örn Þórsson, framkvæmdastjóri Rekstrarfélags Kringlunnar, afhenti Guðrúnu Bergmann Franzdóttur, formanni Neistans, ávísun á söfnunarupphæðina. Með á myndinni er Anney Birta Jóhannesdóttir,dóttir Guðrúnar.

 

Morgunblaðið fimmtudaginn 25. október 2012

Nú er eins gott að draga fram almanakið ogsetja hring um nokkra daga. 

Það stefnir í skemmtilegan vetur hjá okkur.

 

Ævintýragarðurinn (Unglingahópurinn)

Unglingahópurinn ætlar að fjölmenna í Adrenalingarðinn á Nesjavöllum (adrenalin.is) föstudaginn 19. október.  Þetta verður dúnduruppákoma og sennilegast frítt inn fyrir krakkana okkar.  Allt um þennan viðburð á næstu dögum hér á vefnum.

 

Leikhús – Dýrin í Hálsaskógi

Þjóðleikhúsið býður félagsmönnum Neistans 800 kr. afslátt á sýningum sínum á Dýrunum í Hálsaskógi.  Sýningar eru hafnar, svo það er um að gera að rífa upp símann (551 1200) og panta miða.  Muna að nefna Neistann og þá fæst 800 kr. afsláttur af hverjum miða.  Hægt er að panta miða með tölvupósti (midasala@leikhusid.is) en afsláttarmiðareru ekki seldir á netinu.

 

Spilakvöld (foreldra)

Spilakvöld fyrir foreldra hjartabarna verður haldið föstudaginn 2. nóvember.  Menn ráða því hvað þeir taka spilið alvarlega en þarna verða veglegir vinningar í boði.  Og takið eftið því að allir (já, mikið rétt; allir) fá óvæntan glaðning.  Kannski menn kippi með sér einhverri hressingu en spilakvöldið verður auglýst nánar mjög fljótlega.

 

Jólaball

Að vanda verður jólaballið á sínum stað.  Jólasveinninn kemur með pokann góða.  Dansað verður í kringum jólatréð og allt það.  Kaffi og krakkahressingar og bara mikil gleði.  Jólaböllin hafa verið rosalega vel sótt enda stemningin bara frábær. 

Takið frá laugardaginn 8. desember, kl. 14 – 16.

 

Árshátíð – 2013

Stefnan hefur sett á árshátíð foreldra (og aðstandenda og áhugamanna og …) snemma á næsta ári.   Hún hefur ekki verið haldin fyrr en þetta verður alvöru, með skemmtiatriðum, DJ o.s.frv.  Leyilegt verður að beita hvaða trixum sem er, löglegum, til að örva mál- og dansstöðvarnar.  Meira seinna … en allt í lagi að fara að hita sig upp andlega.

 

BINGO – 2013

Að sjálfsögðu verður hið árlega BINGO Neistans á sínum stað.  Bingóin Neistans eru fyrir alla fjölskyldun og er alltaf sérstaklega góð stemning á þeim og vel mætt.  Verið vakandi gagnvart tilkynnungum þar að lútandi þegar næsta ár er komið í gang.

 

Nánari upplýsingar um unglingastarfið er að finna hér.

 

Norðurlandasumarbúðirnar voru haldnar í Nyköping í Svíþjóð í ár.  Aldrei áður hafa jafnmargir sótt um að komast í búðirnar.  Um leið og við fögnum því hvað unglingahópurinn okkar stækkar, þá er það sárt að þurfa hafna umsóknum.  En það kemur sumar aftur að ári og nýjar búðir!

Í sumar sendum við sendum 10 unglinga ásamt 2 fararstjórum og ferðin gekk vel fyrir sig, allir skemmtu sér vel og var hópurinn fljótur að blandast.  Sumarbúðirnar eru ekki bara skemmtun heldur eru þær fræðandi líka.  Krakkarnir sem farið hafa munu aldrei gleyma þessari upplifun.

Hér eru nokkrar myndir frá Nyköping í sumar, sem tala sínu máli:

Dagana 5.-10. sept. verður uppboð á húfum til styrktar Neistanum.  

Húfurnar, sem eru 44 eru prjónaðar af Guðrúnu Magnúsdóttir, höfundi bókarinnar Húfuprjón sem er nýkomin út.  Þær er allar að finna í bókinni.

Hver einasta króna sem fólk greiðir fyrir húfurnar á uppboðinu fer til Neistans. 

Uppboðið er í samstarfi við Meba í Kringlunni. Húfunum er stillt upp í glugga Meba og inni í búðinni er bók þar sem fólk skráir tilboð sitt.

 

Í tilefni þess að Kringlan er 25 ára hefur verið ákveðið að gefa einskonar afmælisgjöf frá Kringlunni og viðskiptavinum til Neistans á þessum tímamótum.

 

Útbúinn hefur verið hjartalaga risasparibaukur úr plexigleri þar sem fólki mun gefast kostur á að styðja þetta góða málefni.  Hugmyndin er að fylla hann af “rauðum” peningaseðlum, sem að söfnun lokinni munu verða afhentir Neistanum.

Helga Valdís Árnadóttir, grafískur hönnuður, hannaði hjartað en Format-Akron smíðaði það og gaf vinnuna. 

 Reykjavíkurmaraþon verður hlaupið laugardaginn 18. ágúst.  Að venju hlaupa margir til styrktar Neistanum og hvetjum við fólk til að heita á þessa hlaupara.

 

Þá sem hlaupa fyrir Neistann má finna hér: http://www.hlaupastyrkur.is/godgerdafelog/felag/490695-2309

Sjónvarpsmynd Páls Kristins Pálssonar, 70 lítil hjörtu, sem Neistinn lét gera og sýnd hefur verið í sjónvarpinu, er nú aðgengileg á Netinu.

 

– Með íslenskum texta: https://vimeo.com/43075759

– Ótextuð: https://vimeo.com/42640755).

– Með enskum texta:

http://www.youtube.com/watch?v=XDN1a47-khM&feature=share

 

Í myndinni er fjallað um meðfædda hjartagalla og þeir skoðaðir frá ýmsum sjónarhornum. Rætt er við lækna, aðstandendur hjartabarna og konu með hjartagalla sem sjálf hefur eignast barn. Myndin hlaut góða dóma og þótti sérstaklega fræðandi. Við hvetjum aðstandendur hjartabarna til að benda vinum og vandamönnum á myndina.